1Jo 5 | PltULB | STEP | Na iza na iza mino fa i Jesosy no Kristy dia naterak’Andriamanitra, ary na iza na iza tia ny Ray ihany koa dia tia ny zanaka naterany.

1 John 5

1 Na iza na iza mino fa i Jesosy no Kristy dia naterak’Andriamanitra, ary na iza na iza tia ny Ray ihany koa dia tia ny zanaka naterany. 2 Noho izany no ahafantarantsika fa tiantsika ireo zanak’Andriamanitra: rehefa tia an’Andriamanitra sy manatanteraka ireo didiny isika. 3 Satria izany no fitiavana ho an’Andriamanitra: dia ny hanatanterahantsika ireo didiny. Ary ireo didiny dia tsy mavesatra.

4 Fa ny olona rehetra izay naterak’Andriamanitra dia mandresy an’izao tontolo izao. Ary izany dia fandresena izay efa nandresy an’izao tontolo izao: ny finoantsika. 5 Iza ilay iray izay mandresy an’izao tontolo izao? Ilay iray izay mino fa i Jesosy dia Zanak’Andriamanitra.

6 Izany dia ilay Iray izay tonga tamin’ny rano sy rà: Jesosy Kristy. Izy dia tonga tsy tamin’ny rano ihany, fa tamin’ny rano sy rà. 7 Fa misy telo izay mijoro vavolombelona: 8 ny Fanahy, ny rano, ary ny rà. Ireo telo ireo dia mifanaraka. [Fanamarihana: Ny dikan-teny taloha sasany dia mivaky toy izao: “Fa misy telo izay mijoro vavolombelona any an-danitra: ny Ray, sy ny Teny, ary ny Fanahy Masina; ary ireo telo ireo dia iray. Ary misy telo izay mijoro vavolombelona eto ambonin’ny tany: ny Fanahy, ny rano, ary ny rà; ary ireo telo ireo dia toy ny iray.” Na izany aza, ireo dikan-teny tsara indrindra dia tsy mivaky toy izany.]

9 Raha mandray ny fijoroana vavolombelon’ny olona isika, dia ho lehibe kokoa ny fijoroana vavolombelon’Andriamanitra. Fa ny fijoroana vavolombelon’Andriamanitra dia izao: izy dia mijoro vavolombelona mahakasika ny Zanany. 10 Na iza na iza mino ny Zanak’Andriamanitra dia manana fijoroana vavolombelona ao amin’izy tenany. Izay tsy mino an’Andriamanitra dia manao Azy ho mpandainga, satria izy dia tsy nino ny fijoroana vavolombelona izay efa nomen’Andriamanitra mahakasika ny Zanany.

11 Ary ny fijoroana vavolombelona dia izao: Andriamanitra dia nanome antsika fiainana mandrakizay, ary izany fiainana izany dia ao amin’ny Zanany. 12 Ilay iray izay manana ny Zanaka dia manana ny fiainana. Ny olona izay tsy manana ny Zanak’Andriamanira dia tsy manana fiainana.

13 Efa nanoratra ireto zavatra ireto ho anareo aho mba hahafantaranareo fa manana ny fiainana mandrakizay ianareo- ho anareo izay mino ny anaran’ny Zanak’Andriamanitra. 14 Toy izany ihany koa, izao no fifanekena izay ananantsika eo anatrehany, fa na inona na inona angatahantsika araka ny sitrapony, dia maheno antsika Izy. 15 Toy izany ihany koa, raha fantantsika fa mandre antsika Izy- na inona na inona angatahantsika Aminy-dia fantantsika fa azontsika izay rehetra nangatahantsika taminy.

16 Raha misy olona iray mahita ny rahalahiny manao fahotana izay tsy miteraka fahafatesena, tsy maintsy mivavaka izy, ary Andriamanitra dia hanome fiainana ho azy. Izaho dia mampitaha ireo izay manana fahotana tsy miteraka fahafatesana. Misy fahotana izay miteraka fahafatesana; tsy miteny aho hoe tokony hivavaka amin’izany izy. 17 Ny tsy fahamarinana rehetra dia fahotana, nefa misy fahotana tsy miteraka fahafatesana.

18 Fantantsika fa na iza na iza naterak’Andriamanitra dia tsy manota. Nefa ilay iray izay naterak’Andriamanitra dia miaro ny tenany, ary ny ratsy dia tsy afaka ny ahakasika azy. 19 Fantantsika fa avy amin’Andriamanitra isika, ary izao tontolo izao dia mitoetra ao amin’ny ratsy.

20 Kanefa fantantsika fa ny Zanak’Andriamanitra dia efa tonga ary efa nanome antsika fahazavan-tsaina mba ahafantarantsika ilay iray izay tena marina. Toy izany ihany koa, isika dia ao amin’ilay iray izay marina, ao amin’i Jesosy Kristy Zanany. Izy no Andriamanitra marina ary fiainana mandrakizay. 21 Anaka, arovy amin’ireo sampy ny tenanareo.